சிங்கப்பூர்: ஆஸ்திரேலியாவின் சிட்னி நகரிலிருந்து சிங்கப்பூருக்கு வந்துகொண்டிருந்த ஸ்கூட் விமானத்தில் அமளியில் ஈடுபட்டு விமானப் பணியாளரைக் கொல்லப்போவதாக மிரட்டல் விடுத்ததாகக் கூறப்படும் 42 வயது இந்திய ஆடவர் மீது இன்று (ஏப்ரல் 1) குற்றம் சாட்டப்பட்டது.
இந்தியாவைச் சேர்ந்த கொலத்து ஜேம்ஸ் லியோ என்பவர் மீது விமானப் பணியாளரின் வலது மணிக்கட்டை இறுகப் பற்றியது, விமானத்தில் அமைதியை சீர்குலைக்கும் விதமாக நடந்துகொண்டது ஆகிய குற்றச்சாட்டுகள் சுமத்தப்பட்டுள்ளன.
பிப்ரவரி 27ஆம் தேதியன்று அவர் விமானத்தில் பயணம் செய்துகொண்டிருந்தபோது குடிபோதையில் கத்தியதாகவும், காலை 11.59 மணிக்கும் பிற்பகல் 12.10 மணிக்கும் இடைப்பட்ட நேரத்தில் தமக்கு முன்னால் இருந்த இருக்கையை அடித்துத் தள்ளியதாகவும் நீதிமன்றத்தில் தெரிவிக்கப்பட்டது. மேலும், அவர் விமான இருக்கையை சேதப்படுத்த முயன்றதாகவும் கூறப்பட்டுள்ளது.
விமானப் பணியாளர்கள் அவரை அமைதிப்படுத்த முயன்றபோது கொலத்து மூர்க்கத்தனமாக நடந்துகொண்டதாகவும், மாலை 5 மணி அளவில் விமானப் பணியாளருக்கு எதிராக கொலை மிரட்டல் விடுத்ததாகவும் நீதிமன்றத்தில் தெரிவிக்கப்பட்டது.
விமானம் சாங்கி விமான நிலையத்தை அடைந்ததும் கொலத்துவை அதிகாரிகள் கைது செய்தனர். அவர் ஏப்ரல் 22ஆம் தேதியன்று குற்றத்தை ஒப்புக்கொள்வார் என்று எதிர்பார்க்கப்படுகிறது.
விமானப் பணியாளரைப் பலவந்தமாக இறுகப் பற்றிய குற்றம் நிரூபிக்கப்பட்டால் அவருக்கு அதிகபட்சம் மூன்று மாதச் சிறைத் தண்டனையுடன் $1,500 அபராதம் விதிக்கப்படலாம். கொலை மிரட்டல் குற்றம் நிரூபிக்கப்பட்டால் பத்தாண்டுகள் வரை சிறையும் அபராதமும் விதிக்கப்படலாம். மேலும், விமானத்தில் பயணம் செய்யும்போது குடிபோதையில் அமைதியை சீர்குலைக்கும் வகையில் நடந்துகொண்டால் ஓராண்டு வரை சிறையும் $20,000 அபராதமும் விதிக்கப்படலாம்.
