சிங்கப்பூர், மார்ச் 06, 2025 – சிங்கப்பூரில் இம்மாதம் (மார்ச்) இறுதிக்குள் சுமார் 2,000 வெளிநாட்டு சுகாதாரப் பராமரிப்பு ஊழியர்களுக்கான தங்கும் வசதிகள் தயாராகிவிடும் என்று சுகாதார அமைச்சர் ஓங் யீ காங் (Ong Ye Kung) தெரிவித்தார். இந்த விடுதிகள் நாட்டின் ஐந்து இடங்களில் அமைக்கப்படவுள்ளன.
தொகுதியில்லா நாடாளுமன்ற உறுப்பினர் ஹேசல் புவா (Hazel Poa) இது தொடர்பாக எழுப்பிய கேள்விக்கு எழுத்துபூர்வமாக பதிலளித்த அமைச்சர் ஓங், பொதுச் சுகாதாரப் பராமரிப்பு அமைப்புகளில் பணியாற்றவிருக்கும் வெளிநாட்டு ஊழியர்களுக்கு இந்த தங்கும் விடுதிகள் உதவிகரமாக இருக்கும் என்று கூறினார். சுகாதார அமைச்சு மற்றும் MOH ஹோல்டிங்ஸ் (MOH Holdings) இணைந்து இந்த வசதிகளை ஏற்படுத்தி வருகின்றன.
இந்த முயற்சி, வெளிநாட்டு சுகாதார ஊழியர்கள் (Foreign Workers) சிங்கப்பூருக்குள் எளிதாக நுழைவதற்கும், பணியைத் தொடங்குவதற்கும் உதவும் என்று அமைச்சர் சுட்டிக்காட்டினார். “புதிதாக வரும் ஊழியர்களுக்கு ஆரம்பகால ஆதரவை வழங்குவதன் மூலம், அவர்கள் இங்கு தடையின்றி பணியைத் தொடங்க முடியும்,” என்று அவர் தனது பதிலில் குறிப்பிட்டார்.
சிங்கப்பூரின் வயதான மக்கள் தொகை அதிகரித்து வருவதால், சுகாதாரத் துறையில் பணியாளர் தேவை அதிகரித்துள்ளது. இதனைச் சமாளிக்க, உள்ளூர் மற்றும் வெளிநாட்டு ஊழியர்களை ஆட்சேர்ப்பு செய்யும் பணிகளை அரசு தீவிரப்படுத்தியுள்ளது. இந்த தங்கும் விடுதிகள், அந்த முயற்சியின் ஒரு பகுதியாக அமைகின்றன.
மேலும், இந்த விடுதிகள் புதிய ஊழியர்களுக்கு தற்காலிக தங்குமிடமாக செயல்பட்டு, பின்னர் அவர்கள் சந்தையில் உள்ள வீட்டு வசதிகளுக்கு மாறுவதற்கு உதவும் என்று சுகாதார அமைச்சு தெரிவித்துள்ளது.
