சிங்கப்பூர், ஏப்ரல் 08, 2025: ரிவர் வேலி (River Valley Fire) ரோட்டில் நேற்று ஏற்பட்ட தீ விபத்தில் சிக்கிய குழந்தைகளை மீட்க உதவிய வெளிநாட்டு ஊழியர்களை இணையவாசிகள் பெரிதும் பாராட்டி வருகின்றனர். இச்சம்பவத்தில் துணிச்சலுடன் செயல்பட்ட இரு வெளிநாட்டு ஊழியர்களை CNA செய்தித் தளம் நேர்காணல் செய்து, அதனை தனது Instagram தளத்தில் பகிர்ந்துள்ளது.
நேற்று காலை 9 மணியளவில் தீ விபத்து ஏற்பட்ட இடத்தில் புகை பரவுவதை அவதானித்த ஊழியர்கள் ரமேஷ் குமார் மற்றும் ஷாகில் முகமது ஆகியோர், உடனடியாக உதவுவதற்காக அங்கு விரைந்தனர். அவர்கள் அப்பகுதியில் உள்ள சாரக்கட்டு பணிகளில் ஈடுபட்டிருந்தனர்.
திரு ரமேஷ் குமார், சாரக்கட்டை பயன்படுத்தி கட்டடத்தின் மேல் ஏறி, குழந்தைகளை ஒவ்வொருவராக பத்திரமாக மீட்டதாக தெரிவித்தார். அதேபோல், திரு ஷாகில் முகமது தனது நண்பருடன் இணைந்து, ஒரு ஏணியை சாரக்கட்டுக்கு அடியில் வைத்து, இரண்டாம் மாடியில் சிக்கியிருந்த குழந்தைகளை மீட்டு தரையில் இருந்தவர்களிடம் ஒப்படைத்தார்.
“புகை பரவுவதைப் பார்த்தவுடன், உதவ வேண்டும் என்ற எண்ணத்தில் ஓடினோம். வேறு சிலரும் உதவ முன்வந்தனர், ஆனால் அவர்கள் யார் என்று தெரியவில்லை,” என்று திரு ரமேஷ் கூறினார்.
இவர்களின் துணிச்சலான செயலை இணையவாசிகள் பெரிதும் புகழ்ந்தனர். “இவர்கள்தான் உண்மையான வீரர்கள்,” “இவர்களுக்கு விருது வழங்க வேண்டும்,” என்று பலரும் கருத்து தெரிவித்தனர். “குழந்தைகளைக் காப்பாற்றியதற்கு நன்றி,” என்று நெகிழ்ச்சியுடன் பதிவிட்டவர்களும் உண்டு.
மேலும், “எல்லாப் புகழும் தங்களுக்கு மட்டும் சேராது” என்று பெருந்தன்மையுடன் கூறிய திரு ரமேஷின் நல்லுள்ளத்தையும் பலர் பாராட்டினர். CNA தளத்தின் Instagram பக்கத்தில் நேற்று வெளியிடப்பட்ட இந்தக் காணொளிக்கு கிட்டத்தட்ட 1,000 கருத்துகள் பதிவாகியுள்ளன.
இச்சம்பவம், அவசர காலத்தில் மனிதநேயத்துடன் செயல்படும் ஊழியர்களின் பங்களிப்பை மீண்டும் ஒருமுறை வெளிச்சத்திற்கு கொண்டு வந்துள்ளது.
