சிங்கப்பூரில் சாலைத் தடைகளைத் தவிர்க்கும் வாகன ஓட்டிகளுக்கான அபராதமும், காவல்துறை அதிகாரிகளுக்கான கூடுதல் அதிகாரமும் அடுத்த 2022ம் ஆண்டு ஜனவரி 1 முதல் அமலுக்கு வருகிறது என்பது குறிப்பிடத்தக்கது. சிங்கப்பூர் காவல் படைச் சட்டத்திற்கான திருத்தங்கள் இந்த ஆண்டு ஆகஸ்ட் 3ம் தேதியன்று நாடாளுமன்றத்தில் நிறைவேற்றப்பட்டன. மேலும் இந்த விதிகள் சிங்கப்பூர் காவல் படையின் (SPF) செயல்பாட்டுத் திறன்களையும், தயார்நிலையையும், மேம்படுத்தும் என்று சிங்கப்பூர் உள்துறை அமைச்சகம் (MHA) இன்று வியாழன் (டிசம்பர் 30) வெளியிட்ட அறிக்கையில் தெரிவித்துள்ளது.
அவை SPFன் ஒழுங்குமுறை, நிர்வாகம் மற்றும் மனித வள செயல்முறைகளை வலுப்படுத்தும் என்று MHA மேலும் கூறியது. பிறக்கவிருக்கும் புதிய ஆண்டில், காவல்துறை அதிகாரிகள் காயம் அல்லது இறப்பில் இருந்து மக்களைப் பாதுகாக்க, மருத்துவ அவசரநிலைகளின் போது, எந்த இடத்திலும் நுழைவதற்கு சட்டப்பூர்வமாக அவர்களுக்கு அதிகாரம் அளிக்கப்படும். தற்போது, அவர்களின் அதிகாரங்கள் கைது செய்வது போன்ற குறிப்பிட்ட சூழ்நிலைகளுக்கு மட்டுப்படுத்தப்பட்டுள்ளன என்பது நினைவுகூரத்தக்கது.
புதிய அதிகாரங்கள் முழுநேர தேசிய சேவையாளர்கள் மற்றும் தன்னார்வ சிறப்புக் காவலர் அலுவலர்கள் உட்பட சிறப்பு காவல் அதிகாரிகளுக்கும் பொருந்தும். அவர்கள் தற்போது விசாரணை அதிகாரங்களைக் கொண்டுள்ளனர், மேலும் வணிக மற்றும் நிதிக் குற்றங்களை விசாரிக்கும் வணிக விவகார அதிகாரிகள் அதிக அதிகாரங்களைப் பெறுவார்கள், திருடப்பட்ட பொருட்களை வைத்திருப்பவர்களைக் கைது செய்ய இனி அவர்கள் அனுமதிக்கப்படுவார்கள்.
அதேநேரத்தில் புதிய சாலை விதிகளின்படி சாலைத் தடைகளைத் தவிர்ப்பவர்களுக்கு ஏழு ஆண்டுகள் வரை சிறைத்தண்டனை மற்றும் S$10,000 வரை அபராதம் விதிக்கப்படலாம். இது தற்போது அதிகபட்ச சிறைத்தண்டனையாக 12 மாதங்கள் மற்றும் அதிகபட்ச அபராதமாக S$5,000 உள்ளது என்பது குறிப்பிடத்தக்கது.
