சிங்கப்பூரின் சுறுசுறுப்பான பணிச்சூழலில் உழைக்கும் தொழிலாளர்களுக்கு, விடுமுறைகள் வெறும் ஓய்வு எடுப்பதற்கு மட்டும் இல்லை. அவை அவர்களின் உடல் ஆரோக்கியத்துக்கும், மனநிம்மதிக்கும் ரொம்ப முக்கியம்.
சிங்கப்பூரின் தொழிலாளர் சட்டம் (Employment Act), வேலை செய்பவர்களுக்கு சில அடிப்படை உரிமைகளையும் நிபந்தனைகளையும் கொடுத்திருக்கிறது. இதில், விடுமுறை உரிமைகள் ரொம்ப முக்கியம். ஏனெனில், இவை வேலை செய்பவர்களின் மனநலத்துக்கும் உடல் நலத்துக்கும் நல்லது, கூடவே குடும்ப விஷயங்களையும் கவனிக்க உதவும்.
MOM இணையதளத்தில் (மனிதவள அமைச்சகத்தின்) என்னென்ன விடுமுறைகள் இருக்கின்றன, யாருக்கு எவ்வளவு நாள் விடுமுறை கிடைக்கும், சம்பளத்துடன் எத்தனை நாள் விடுமுறை எடுக்கலாம்னு எல்லா விவரமும் தெளிவாக இருக்கிறது.
MOM இன் இணையதளத்தில் குறிப்பிடப்பட்டுள்ள முக்கிய விடுமுறை வகைகள்:
ஆண்டு விடுமுறை (Annual Leave):
- முதலாளியிடம் குறைந்தபட்சம் 3 மாதங்கள் பணியாற்றியிருக்க வேண்டும். Employment Act-இன் கீழ் வரும் அனைத்து ஊழியர்களுக்கும் இது பொருந்தும், ஆனால் மேலாளர்கள் மற்றும் நிர்வாகப் பணியாளர்களுக்கு (executives) பகுதி IV விதிகள் பொருந்தாது.
- முதல் ஆண்டில் 7 நாட்கள் சம்பளத்துடன் கூடிய விடுமுறை.
- ஒவ்வொரு ஆண்டு பணி முடித்த பிறகு, ஒரு நாள் கூடுதல் விடுமுறை (எ.கா., 2வது ஆண்டு 8 நாட்கள், 3வது ஆண்டு 9 நாட்கள்).
- பகுதி நேர ஊழியர்களுக்கு, வேலை செய்யும் மணிநேரத்தின் அடிப்படையில் விடுமுறை கணக்கிடப்படும்.
- எடுக்கப்படாத விடுமுறையை அடுத்த வருடத்துக்குக் கொண்டு போகலாம் (முதலாளி ஒப்புதல் அளித்தால்) இல்லையெனில் அதற்குப் பதிலாக பணமாக வாங்கிக்கலாம். வேலையை விட்டு நின்றாலோ அல்லது வேலை நிறுத்தப்பட்டாலோ, பயன்படுத்தாத விடுமுறை நாட்களுக்கு சம்பளம் கொடுக்கப்பட வேண்டும்.
நோய் விடுமுறை (Sick Leave):
- முதலாளியிடம் குறைந்தபட்சம் 3 மாதங்கள் பணியாற்றியிருக்க வேண்டும். மருத்துவரால் வழங்கப்பட்ட மருத்துவச் சான்றிதழ் (MC) தேவை.
- வெளிநோயாளி விடுமுறை: ஒரு வருடத்துக்கு 14 நாள் சம்பளத்துடன் விடுமுறை கிடைக்கும்.
- மருத்துவமனை விடுமுறை: ஆஸ்பத்திரியில் அட்மிட் ஆகி சிகிச்சை எடுத்தால் ஒரு வருடத்துக்கு 60 நாள் வரை விடுமுறை கிடைக்கும் (இதில் வெளிநோயாளி விடுமுறை சேர்ந்திடும்).
- உதாரணத்துக்கு: ஒருவர் 5 நாள் வெளிநோயாளி விடுமுறை எடுத்திருந்தால், அவருக்கு இன்னும் 55 நாள் ஆஸ்பத்திரி விடுமுறை கிடைக்கும்.
- முக்கிய விஷயம்: விடுமுறை எடுக்கும் நாட்கள் வேலை இல்லாத நாளாக (உதாரணத்துக்கு, வார ஓய்வு நாள்) இருந்தால், அது இந்த விடுமுறை கணக்கில் சேராது.
பிரசவ விடுமுறை (Maternity Leave):
- முதலாளியிடம் குறைந்தபட்சம் 3 மாதங்கள் வேலை பார்த்திருக்க வேண்டும்.\சிங்கப்பூர் குடிமகனான குழந்தை: 16 வாரம் சம்பளத்துடன் அரசு நிதியளிக்கும் பிரசவ விடுமுறை (GPML) கிடைக்கும்.
- சிங்கப்பூர் குடியுரிமை இல்லாத குழந்தை: 12 வாரம் சம்பளத்துடன் விடுமுறை கிடைக்கும்.
- இரட்டைக் குழந்தைகள் பிறந்தால், சீக்கிரம் குழந்தை பிறந்தால், அல்லது தனியாக குழந்தை வளர்க்கும் அம்மாக்களுக்கு (ஒற்றைத் தாய்மார்கள்) கூடுதல் சலுகைகள் இருக்கின்றன.
குழந்தை பராமரிப்பு விடுமுறை (Childcare Leave):
- முதலாளியிடம் குறைந்தபட்சம் 3 மாதங்கள் வேலை பார்த்திருக்க வேண்டும்.
- குழந்தை 7 வயதுக்குக் கீழ் இருக்க வேண்டும்.
- சிங்கப்பூர் குடிமகனான குழந்தை: ஒரு வருடத்துக்கு 6 நாள் சம்பளத்துடன் விடுமுறை கிடைக்கும்.
- சிங்கப்பூர் குடியுரிமை இல்லாத குழந்தை: ஒரு வருடத்துக்கு 2 நாள் சம்பளத்துடன் விடுமுறை கிடைக்கும்.
- இந்த விடுமுறையை அம்மாவும் அப்பாவும் பிரித்து எடுத்துக்கொள்ளலாம்.
- 7 வயது முதல் 12 வயதுக்குட்பட்ட சிங்கப்பூர் குடிமக குழந்தைகளுக்கு, ஒரு வருடத்துக்கு 2 நாள் சம்பளமில்லா குழந்தை பராமரிப்பு விடுமுறை கிடைக்கும்.
தந்தையர் விடுமுறை (Paternity Leave):
- தந்தை முதலாளியிடம் குறைந்தபட்சம் 3 மாதங்கள் பணியாற்றியிருக்க வேண்டும்.
- குழந்தை பிறந்த 12 மாதங்களுக்குள் விடுமுறை எடுக்க வேண்டும்.
- 4 வாரம் சம்பளத்துடன் அரசு நிதியளிக்கும் தந்தையர் விடுமுறை (GPPL) கிடைக்கும்.
- சுயதொழில் செய்பவர்களும் இந்த விடுமுறைக்குத் தகுதியானவர்கள்.
பகிரப்பட்ட பெற்றோர் விடுமுறை (Shared Parental Leave):
- குழந்தை சிங்கப்பூர் குடிமகனாக இருக்க வேண்டும்.
- அம்மா அல்லது அப்பா, குறைந்தபட்சம் 3 மாதங்கள் வேலை பார்த்திருக்க வேண்டும்.
- பிரசவ விடுமுறையில் இருந்து 4 வாரம் வரை அப்பாவும் அம்மாவும் பிரித்து எடுத்துக்கொள்ளலாம்.
- இந்த விடுமுறையை குழந்தை பிறந்த 12 மாதங்களுக்குள் எடுத்து முடிக்க வேண்டும்.
விடுமுறை எடுக்கும்போது கவனிக்க வேண்டிய முக்கியமான விஷயங்கள்:
தேவையான ஆவணங்கள்: நோய் விடுமுறைக்கு மருத்துவச் சான்றிதழ் (MC) கொடுக்க வேண்டும். அதேபோல், பிரசவ விடுமுறை அல்லது தந்தையர் விடுமுறைக்கு, குழந்தையின் பிறப்புச் சான்றிதழ் போன்ற ஆவணங்கள் தேவைப்படும்.
முதலாளிக்குத் தகவல்: விடுமுறை எடுப்பதற்கு முன்னால், முதலாளிக்கு முறையாகத் தகவல் சொல்ல வேண்டும். உதாரணத்துக்கு, பிரசவ விடுமுறைக்கு ஒரு வாரம் முன்னதாகவே சொல்ல வேண்டும்.
பயன்படுத்தாத விடுமுறை: ஒரு வருடத்தில் உங்களுக்கு கிடைத்த ஆண்டு விடுமுறையை பயன்படுத்தவில்லை என்றால், அதற்கு பணமாக வாங்கிக்கலாம் அல்லது அடுத்த வருடத்துக்கு எடுத்துச் செல்லலாம். இது உங்கள் கம்பெனியின் விதிமுறைகளைப் பொறுத்தது.
வேலை விட்டு நின்றால்: வேலையை விட்டு விலகும்போது, பயன்படுத்தாத ஆண்டு விடுமுறை நாட்களுக்கு சம்பளம் கட்டாயம் கொடுக்கப்பட வேண்டும்.
இந்த விடுமுறைகள் தொடர்பான விரிவான தகுதிகள் மற்றும் விதிமுறைகள் குறித்து MOM-இன் அதிகாரப்பூர்வ இணையதளத்தில் நேரடியாகத் தெரிந்துகொள்ளலாம்.
