இந்தியாவில் விமானப் பயணிகளின் எண்ணிக்கை தொடர்ந்து அதிகரித்து வரும் நிலையில், சௌகரியமான பயணத்தை விரும்பும் வாடிக்கையாளர்களின் எண்ணிக்கை கணிசமாக உயர்ந்துள்ளது. இந்த அதிகரித்துவரும் தேவையைப் பூர்த்தி செய்யும் விதமாக, டாடா குழுமத்தின் ஏர் இந்தியா நிறுவனம் தனது பிரீமியம் எகானமி சேவையை விரிவாக்கம் செய்துள்ளது.
சமீபத்திய தகவல்களின்படி, கடந்த மூன்று ஆண்டுகளில் பிரீமியம் பயணத்திற்கான தேவை இரண்டு மடங்கு அதிகரித்துள்ளது. இதனை கருத்தில் கொண்டு ஏர் இந்தியா நிறுவனம் இந்த புதிய முயற்சியை மேற்கொண்டுள்ளது.
குறைந்த கட்டணத்தில் பிரீமியம் சேவை:
ஏர் இந்தியா தனது பிரீமியம் எகானமி வகுப்புக்கான ஆரம்ப கட்டணத்தை வெறும் ரூ.599 ஆக நிர்ணயித்துள்ளது. வழக்கமான டிக்கெட் கட்டணத்துடன் இந்த சிறிய தொகையைச் செலுத்துவதன் மூலம் மேம்படுத்தப்பட்ட பிரீமியம் சேவைகளை பயணிகள் பெற முடியும். இருப்பினும், இது அறிமுக விலை மட்டுமே என்றும், வழித்தடம் மற்றும் தேவைக்கேற்ப கட்டணங்கள் மாறுபடலாம் என்றும் ஏர் இந்தியா தெரிவித்துள்ளது.
முதற்கட்டமாக 39 வழித்தடங்களில் அறிமுகம்:
தற்போது உள்நாட்டில் 39 முக்கிய வழித்தடங்களில் இந்த பிரீமியம் சேவை அறிமுகப்படுத்தப்பட்டுள்ளது. இதன் மூலம் வாரத்திற்கு 50,000க்கும் மேற்பட்ட பிரீமியம் எகானமி இருக்கைகள் பயணிகளுக்கு கிடைக்கும். குறிப்பாக, அதிக பயணிகள் பயணிக்கும் டெல்லி-மும்பை, டெல்லி-பெங்களூரு, டெல்லி-ஹைதராபாத், மும்பை-பெங்களூர் மற்றும் மும்பை-ஹைதராபாத் போன்ற வழித்தடங்களுக்கு மட்டும் 34,000 இருக்கைகள் ஒதுக்கப்பட்டுள்ளன.
விமானங்கள் மறுசீரமைப்பு:
ஏர் இந்தியா நிறுவனம் தனது 27 ஏ320 ரக விமானங்களை மறுசீரமைப்பு செய்து வருகிறது. இதன் மூலம் பிரீமியம் எகானமி இருக்கைகளின் எண்ணிக்கை சுமார் 30% வரை அதிகரிக்கும். இதன் விளைவாக, மொத்த பிரீமியம் எகானமி இருக்கைகளின் எண்ணிக்கை 65,000 ஆக உயரும். இந்த விமானங்கள் உள்நாட்டுச் சேவைக்கும், குறுகிய தூர சர்வதேசப் பயணங்களுக்கும் பயன்படுத்தப்படும் என எதிர்பார்க்கப்படுகிறது.
பிரீமியம் எகானமியில் என்னென்ன வசதிகள்?
ஏர் இந்தியாவின் பிரீமியம் எகானமி இருக்கைகளில் பயணிப்பவர்களுக்கு கூடுதல் கால் நீட்டி அமர இடவசதி, விமான நிலைய செக்-இன், போர்டிங் மற்றும் லக்கேஜ் ஆகியவற்றில் முன்னுரிமை, சிறந்த இருக்கைகள் மற்றும் தரமான உணவு போன்ற வசதிகள் வழங்கப்படும். மேலும், பயணிகள் தங்களுக்கு விருப்பமான இருக்கைகளைத் தேர்ந்தெடுக்கும் வாய்ப்பும் உள்ளது.
இலவச வைஃபை சேவை:
சமீபத்தில் ஏர் இந்தியா தனது விமானங்களில் இலவச வைஃபை சேவையை அறிமுகப்படுத்தியது குறிப்பிடத்தக்கது. தற்போது இலவசமாக வழங்கப்பட்டு வரும் இந்த சேவைக்கு எதிர்காலத்தில் கட்டணம் வசூலிக்கப்படலாம் என எதிர்பார்க்கப்படுகிறது.
இந்தியாவில் விமானப் பயணத்தின் வளர்ச்சி தொடர்ந்து அதிகரித்து வருவதால், பிரீமியம் சேவைகளுக்கான தேவையும் மேலும் அதிகரிக்கும் என்று விமானத் துறை வல்லுநர்கள் கருதுகின்றனர். ஏர் இந்தியாவின் இந்த புதிய முயற்சி வாடிக்கையாளர்கள் மத்தியில் நல்ல வரவேற்பைப் பெறும் என எதிர்பார்க்கப்படுகிறது.
