நம்பிக்கை துரோகம்: வெளிநாட்டு வேலை போலி விசாக்களால் மொத்த பணமும் பறிபோனது!

கடலூர், மே 20 – வெளிநாடுகளில் வேலை வாங்கித் தருவதாகக் கூறி, மெக்கானிக் ஒருவரிடம் ரூ. 4.10 லட்சம் மோசடி செய்த கும்பல் தலைவனை கடலூர் மாவட்ட குற்றப்பிரிவு போலீசார் கைது செய்து சிறையில் அடைத்துள்ளனர். இந்தச் சம்பவம் கடலூர் மாவட்டத்தில் பெரும் அதிர்ச்சியை ஏற்படுத்தியுள்ளது.

சம்பவத்தின் பின்னணி:

விருத்தாசலம் அடுத்த வடகிருஷ்ணாபுரத்தைச் சேர்ந்த 44 வயது மெக்கானிக் வீரமோகன். விருத்தாசலம் அடுத்த ஏ.சித்துார், வடக்கு காலனியைச் சேர்ந்த கொளஞ்சி மகன் குமார் (35). குமார் வேப்பூரில் ‘கே.கே.பி இன்டர்நேஷனல் மேன்பவர் கன்சல்டன்சி’ என்ற பெயரில் வெளிநாடுகளுக்கு ஆட்களை அனுப்பும் நிறுவனத்தை நடத்தி வந்துள்ளார்.

கடந்த 2023 ஆம் ஆண்டு, வீரமோகனும் அவருடைய மைத்துனர் மகன் கருப்புசாமியும் குமார் வெளிநாடுகளுக்கு ஆட்களை வேலைக்கு அனுப்புவதாக அறிந்து, அவரைத் தொடர்பு கொண்டுள்ளனர். குமார் இருவரையும் வேப்பூரில் உள்ள தனது அலுவலகத்திற்கு வருமாறு அழைத்துள்ளார்.

மோசடி அரங்கேறியது எப்படி?

அலுவலகத்தில் குமாருடன் பேசியபோது, வீரமோகனுக்கு குரோஷியா நாட்டிலும், கருப்புசாமிக்கு கனடா நாட்டிலும் வேலை வாங்கித் தருவதாகக் குமார் ஆசை வார்த்தை கூறியுள்ளார். குரோஷியா வேலைக்கு ரூ. 3.50 லட்சமும், கனடா வேலைக்கு ரூ. 10 லட்சமும் கேட்டிருக்கிறார்.

இதனை நம்பிய வீரமோகன், ஐந்து தவணைகளில் ரூ. 2.70 லட்சத்தையும், கருப்புசாமி மூன்று தவணைகளில் ரூ. 1.40 லட்சத்தையும் இந்தியன் வங்கி கணக்கு மூலம் குமாருக்கு அனுப்பியுள்ளனர். மொத்தம் ரூ. 4.10 லட்சம் பணத்தை அவர்கள் செலுத்தியுள்ளனர்.

சிங்கப்பூரில் Work Permit-ல் வேலை பார்க்குறீங்களா? இந்த சட்டத்தை பற்றி கண்டிப்பா தெரிஞ்சிக்கோங்க !

போலி விசாக்களும் ஏமாற்றமும்:

பணம் செலுத்திய நான்கு மாதங்கள் கழித்து, இருவரும் வெளிநாட்டு விசாவுக்கு விண்ணப்பித்தபோதுதான் அதிர்ச்சி காத்திருந்தது. அவர்கள் சமர்ப்பித்த விண்ணப்பப் படிவங்கள் அனைத்தும் போலியானவை எனக்கூறி விசா மறுக்கப்பட்டுள்ளது.

உடனே, புரோக்கர் குமாரைத் தொடர்புகொண்டு பணத்தைத் திருப்பிக் கேட்டுள்ளனர். பணத்தைத் திருப்பிக் கொடுப்பதாகக் குமார் உறுதியளித்தும், பல மாதங்களாக தரவில்லை.

காவல்துறையில் புகார்:

வேப்பூர் காவல் நிலையத்தில் புகார் அளித்தபோது, குமார் ரூ. 70,000 மட்டுமே திருப்பிக் கொடுத்துள்ளார். மீதிப் பணத்தைக் கொடுக்காமல் இழுத்தடித்து வந்துள்ளார். பின்னர், குமாரின் அலுவலகத்திற்குச் சென்று பார்த்தபோதுதான், அவரைப் போன்று மேலும் பலரை ஏமாற்றியிருப்பது தெரியவந்துள்ளது.

இதையடுத்து, வீரமோகன் கடலூர் மாவட்ட எஸ்.பி. ஜெயக்குமாரியிடம் புகார் அளித்துள்ளார். புகாரைப் பெற்ற எஸ்.பி., அதனை மாவட்ட குற்றப்பிரிவு விசாரணைக்கு பரிந்துரை செய்து, வழக்குப் பதிவு செய்து நடவடிக்கை எடுக்க உத்தரவிட்டார்.

மோசடி பேர்வழி கைது:

எஸ்.பி.யின் உத்தரவின் பேரில், மாவட்ட குற்றப்பிரிவு இன்ஸ்பெக்டர் குருமூர்த்தி, எஸ்.ஐ. லிடியாசெல்வி ஆகியோர் விசாரணை நடத்தி, மோசடியில் ஈடுபட்ட குமாரை கைது செய்து கடலூர் மத்திய சிறையில் அடைத்தனர்.

வெளிநாட்டு வேலை வாய்ப்பு மோசடிகள் அதிகரித்து வரும் நிலையில், பொதுமக்கள் விழிப்புடன் செயல்பட்டு, அங்கீகரிக்கப்பட்ட முகவர்கள் மூலமாக மட்டுமே விண்ணப்பிக்க வேண்டும் என காவல்துறையினர் அறிவுறுத்தியுள்ளனர்.

புது E-பாஸ்போர்ட் வந்துருச்சு! உங்க பாஸ்போர்ட் நிலவரம் என்ன? அப்ளை செய்வது எப்படி?