சிங்கப்பூர்: புக்கிட் தீமா வட்டாரத்தில் வீடுகளில் கொள்ளையடிக்க முயன்றதாக சந்தேகிக்கப்படும் மூன்று வெளிநாட்டு ஆடவர்களை சிங்கப்பூர் காவல்துறையினர் ஞாயிற்றுக்கிழமை (மே 11) கைது செய்தனர். கைதானவர்கள் 48 முதல் 60 வயதுக்கு உட்பட்டவர்கள் ஆவர்.
குளுனி பார்க், டனர்ன் குளோஸ் மற்றும் எங் நியோ அவென்யூ ஆகிய பகுதிகளில் உள்ள வீடுகளில் சந்தேக நபர்கள் அத்துமீறி நுழைந்தது குறித்து மே 9 மற்றும் 10 ஆகிய தேதிகளில் காவல்துறைக்கு புகார்கள் வந்தன. முதல் புகார் அளிக்கப்பட்ட 27 மணி நேரத்திற்குள் இந்த மூன்று வெளிநாட்டு ஆடவர்களும் கைது செய்யப்பட்டனர் என்பது குறிப்பிடத்தக்கது.
தங்ளின் காவல் நிலைய அதிகாரிகள், காவல் செயல்பாட்டுத் தளபத்திய நிலைய அதிகாரிகள் மற்றும் காவல்துறையின் புலனாய்வுப் பிரிவினர் ஆகியோர் இணைந்து தீவிர விசாரணை மேற்கொண்டனர். கண்காணிப்பு கேமராக்கள் மற்றும் காவல்துறைக் கேமராக்களின் உதவியுடன் சந்தேக நபர்கள் அடையாளம் காணப்பட்டனர்.
கைது செய்யப்பட்ட மூவரில் ஒருவர் ஸ்பெயின் மற்றும் கொலம்பியாவைச் சேர்ந்த இரட்டைக் குடியுரிமை பெற்ற 60 வயது ஆடவர் ஆவார். மற்றொருவர் மெக்சிகோவைச் சேர்ந்த 51 வயது ஆடவர். மூன்றாவது நபர் மெக்சிகோ மற்றும் கொலம்பியா ஆகிய நாடுகளின் இரட்டைக் குடியுரிமை பெற்ற 48 வயது ஆடவர் ஆவார். இவர்கள் மூவரும் கடந்த இரண்டு வாரங்களில் சுற்றுலாப் பயணிகளாக சிங்கப்பூருக்கு வந்துள்ளனர்.
கைது செய்யப்பட்டவர்களிடமிருந்து ஒரு கார், இரும்பை அறுக்கும் ரம்பம், நகைகள் மற்றும் $18,000க்கும் அதிகமான மதிப்புள்ள பல்வேறு நாடுகளின் ரொக்கப் பணம் ஆகியவை பறிமுதல் செய்யப்பட்டன.
இந்த ஆடவர்கள் மீது திருடும் நோக்கத்துடன் வீடு புகுந்த குற்றம் சுமத்தப்பட்டுள்ளது. குற்றம் நிரூபிக்கப்பட்டால், ஒவ்வொருவருக்கும் 10 ஆண்டுகள் வரை சிறைத் தண்டனை அல்லது அபராதம் விதிக்கப்படக்கூடும் என்று காவல்துறை தெரிவித்துள்ளது.
2025-ல் சிங்கப்பூரின் கட்டுமானத் துறை நிறுவனங்கள் எவ்வாறு பணியாளர்களை தேர்வு செய்கிறது?
சந்தேக நபர்களை விரைவாகக் கைது செய்வதற்கு உதவிய பொதுமக்களில் இருவருக்கு காவல்துறை அதிகாரிகள் பாராட்டுச் சான்றிதழ்களை வழங்கினர்.
சிங்கப்பூரில் வீடு புகுந்து கொள்ளையடிக்கும் சம்பவங்கள் குறைந்து வந்தாலும், பன்னாட்டு குற்றவாளிகள் சிங்கப்பூரை குறிவைக்க வாய்ப்புள்ளதாக அதிகாரிகள் எச்சரித்துள்ளனர். பொதுமக்கள் தொடர்ந்து விழிப்புடன் இருக்க வேண்டும் என்றும் அவர்கள் அறிவுறுத்தியுள்ளனர்.
