சிங்கப்பூரில் அவசர சிகிச்சை தேவைப்படுபவர்கள் உடனடியாக அதைப் பெற முடியும் என்பதை உறுதி செய்ய உயிருக்கு ஆபத்தான அவசரநிலை ஏற்பட்டால் 995 ஐ மட்டுமே தொடர்பு கொள்ளுமாறு பொதுமக்களுக்கு அறிவுறுத்தப்பட்டுள்ளது.
சிங்கப்பூர் தற்போது கோவிட்-19 உடன் வாழக் கற்றுக் கொள்வதால் அவசர மருத்துவச் சேவைகள் மற்றும் அவசர சிகிச்சைப் பிரிவுகளை விவேகமாகப் பயன்படுத்துவது முக்கியம் என சுகாதார அமைச்சகமும் (MOH) சிங்கப்பூர் குடிமைத் தற்காப்புப் படையும் (SCDF) நேற்று திங்கள்கிழமை (அக் 25) தெரிவித்தன.
அவசர சிகிச்சை தேவைப்படும் நோயாளிகள் அதை சரியான நேரத்தில் மற்றும் விரைவாகப் பெற முடியும் என்பதை இது உறுதி செய்யும், என்று தெரிவிக்கப்பட்டது. கொவிட் -19 நோயாளிகளுக்கு மட்டுமல்ல, உயிருக்கு ஆபத்தான மற்றும் அவசர நிலைகளால் பாதிக்கப்பட்ட அனைத்து நோயாளிகளுக்கும் 995 ஹாட்லைன் சேவையை பயன்படுத்தலாம்.
உயிருக்கு ஆபத்தான மற்றும் அவசர நிலைகளில் திடீரென நெஞ்சு வலி, மூச்சுத் திணறல், தூக்கம் அல்லது குழப்பம், திடீரென மூட்டு அல்லது உடல் பலவீனம், பேசுவதில் சிரமம், அல்லது முகத்தில் தொய்வு, காயங்களால் கடுமையான இரத்தப்போக்கு, சுயநினைவு இழப்பு மற்றும் விவரிக்க முடியாத இழுப்பு ஆகியவையும் அடங்கும்.
SCDF 995 செயல்பாட்டு மையத்திற்கு அக்டோபர் 15 முதல் அக்டோபர் 21 வரை சுமார் 5,500 அழைப்புகள் வந்ததாக அதிகாரிகள் தெரிவித்தனர். அதில் 20 சதவீதம் பேர் கோவிட் -19 நோயாளிகளிடமிருந்து வந்த அழைப்புகளாகும்.
அவசர சிகிச்சைப் பிரிவுக்கு அழைத்துச் செல்லப்பட்ட கோவிட் -19 நோயாளிகளில், 47 சதவீதம் பேர் ஒரு நாள் சிகிச்சை மட்டுமே பெற்றனர் மற்றும் மருத்துவமனையில் அனுமதிக்கப்பட வேண்டிய அவசியமில்லாத நிலையில் இருந்தனர். அதே நேரத்தில் 15 சதவிகிதம் இரண்டு நாட்கள் அல்லது அதற்கும் குறைவாக வார்டுகளில் அனுமதி செய்யப்பட்டு கவனிக்கப்பட்டனர்.
MOH மற்றும் SCDF லேசான அறிகுறிகளைக் கொண்ட COVID-19 நோயாளிகளுக்கு பாலிமரேஸ் சங்கிலி எதிர்வினை (PCR) சோதனை அல்லது ஆன்டிஜென் விரைவு சோதனை (ART) மூலம் நேர்மறை சோதனை செய்ததா என்பதைப் பொறுத்து, வேறு இடங்களில் மருத்துவ உதவியை நாடுமாறு அறிவுறுத்தியதும் குறிப்பிடத்தக்கது.
