சிங்கப்பூரில் தோலழற்சி பிரச்னைக்காக அங் மோ கியோவில் உள்ள ஒரு காப்பி கடையில் மாத்திரைகள் வாங்கிய 50 வயதுகளில் உள்ள ஆடவர் ஒருவருக்கு, இரண்டு ஆண்டுகளாக Tong Mai 9 Gu Jiao Rou என்ற மாத்திரையை உட்கொண்டதால் வயிற்றில் கடுமையான புண் ஏற்பட்டு அறுவை சிகிச்சை செய்ய வேண்டிய நிலை ஏற்பட்டுள்ளது. இதைத் தொடர்ந்து சுகாதார அறிவியல் ஆணையம் (Singapore HSA) நடத்திய விசாரணையில், இந்த மாத்திரையில் தடை செய்யப்பட்ட பொருள்கள் இருப்பது கண்டறியப்பட்டுள்ளது.
HSA-ன் அறிக்கையின்படி, Tong Mai 9 Gu Jiao Rou மாத்திரையில் டெக்ஸாமெதாசோன் (ஒரு ஸ்டீராய்டு) மற்றும் பிராக்ஸிகாம் (வலி நிவாரணி) போன்ற தடை செய்யப்பட்ட பொருள்கள் உள்ளன. இவற்றை உட்கொள்வதால் உடலுக்கு தீவிர ஆபத்து ஏற்படலாம் என்று எச்சரிக்கப்பட்டுள்ளது. இந்த ஆடவருக்கு குஷிங் சிண்ட்ரோம் அறிகுறிகள்—முகம் வட்டமாதல், தோல் மெலிதாதல் மற்றும் எளிதில் தோலில் காயம் ஏற்படுதல்—போன்ற பக்க விளைவுகளும் ஏற்பட்டுள்ளன.
இதேபோல், EZ Empire Be Perfect என்ற உடல் எடை அதிகரிக்கும் மருந்து மற்றும் Re5hape hi Morning, Re5hape bye Night என்ற உடல் எடை குறைப்பு மருந்துகளையும் பயன்படுத்த வேண்டாம் என்று HSA எச்சரித்துள்ளது. Re5hape hi Morning மருந்தில் சிபுட்ரமைன் (தடை செய்யப்பட்ட பொருள்) மற்றும் Re5hape bye Night மருந்தில் சென்னோசைட்ஸ் (மலமிளக்கி) உள்ளதாக கண்டறியப்பட்டுள்ளது. இவை உடலுக்கு தீங்கு விளைவிக்கும் என்பதால், இம்மருந்துகளை உட்கொள்பவர்கள் உடனடியாக மருத்துவரை அணுக வேண்டும் என்று அதிகாரிகள் அறிவுறுத்தியுள்ளனர்.
HSA, இத்தகைய தடை செய்யப்பட்ட பொருள்கள் அடங்கிய மருந்துகளை விற்பனை செய்யும் ஆன்லைன் தளங்களான Carousell மற்றும் Shopee-இல் உள்ள பட்டியல்களை நீக்க நடவடிக்கை எடுத்துள்ளது. பொதுமக்கள் இத்தகைய மருந்துகளை வாங்குவதைத் தவிர்க்கவும், உடல் நலம் தொடர்பான பிரச்னைகளுக்கு மருத்துவர்களை அணுகவும் அறிவுறுத்தப்பட்டுள்ளனர்.
