அண்டை நாடான இந்தியாவில் உள்ள நமது தமிழ்நாட்டை பொறுத்தவரை வெள்ளித்திரை நடிகர் நடிகைகளுக்கு எந்த அளவுக்கு வரவேற்பு உள்ளதோ அதே அளவிற்கான ரசிகர்கள் கூட்டம் சின்னத்திரை நடிகர் நடிகைகளுக்கும் உண்டு. சின்னத்திரையில் பலரை கவர்ந்த சந்தானம், சிவகார்த்திகேயன், ரோபோ ஷங்கர் போன்ற எண்ணற்ற நட்சத்திரங்கள் இன்று வெள்ளித்திரையில் மின்னுவதே அதற்கு சாட்சி. இந்நிலையில் சின்னத்திரையில் ஜோடிபோட்டு கலக்கும் ஒரு தம்பதி உள்ளது என்றால் அது நம்ம ஆல்யா மானசா மற்றும் சஞ்சீவ் ஜோடிதான்.
சஞ்சீவ் மற்றும் ஆல்யாவிற்கு நடந்தது காதல் திருமணம் தான், பெற்றோரின் எதிர்ப்பை தாண்டி இருவரும் திருமணம் செய்துகொண்டனர். அந்த அழகிய காதலுக்கு சாட்சியாக இவர்களுக்கு கடந்த 2020ம் ஆண்டு அழகிய பெண் குழந்தை ஒன்று பிறந்தது. அய்லா சையத் என்ற அந்த பெண் குழந்தை பிறந்தபோது சஞ்சீவ் தனது மனைவிக்கு ஒரு சொகு கார் பரிசளித்தது அனைவரும் அறிந்ததே. சிறிது காலம் சின்னத்திரைக்கு லீவு கொடுத்திருந்த மானசா அதன் பிறகு மீண்டும் ராஜா ராணி 2 என்ற நாடகத்தில் நடித்து வந்தார்.