சிங்கப்பூரில் பெருந்தொற்று வழக்குகள் கண்டறியப்பட்டதைத் தொடர்ந்து ஆழ்ந்த சுத்தம் மற்றும் கிருமி நீக்கம் செய்வதற்காக மூன்று நாள் தற்காலிகமாக மூடப்பட்ட பின்னர், பசீர் பஞ்சாங் மொத்த விற்பனை மையம் இன்று வியாழக்கிழமை (செப்டம்பர் 30) பிற்பகல் மீண்டும் திறக்கப்பட்டது. இருப்பினும், பல தொழிலாளர்கள் மற்றும் குத்தகைதாரர்களுக்கு ஸ்வாப் சோதனை முடிவுகள் தேவைப்படாததால் அவர்களுக்கு இன்று அனுமதி மறுக்கப்பட்டது.
இன்று மதியம் 1 மணி அளவில் ஸ்ட்ரெய்ட்ஸ் டைம்ஸ் செய்தி நிறுவனம் அந்த விற்பனை மையத்தை பார்வையிட்டபோது, மையத்திற்கு வெளியே சுமார் 35 தொழிலாளர்கள் மற்றும் குத்தகைதாரர்கள் வரிசையில் நின்று கொண்டிருந்தனர் என்று குறிப்பிட்டுள்ளது. ஒவ்வொரு ஐந்து முதல் 10 நிமிடங்களுக்கும் மூன்று முதல் நான்கு லாரிகள் அங்கு நுழைகின்றன. “அதன் பிறகு பிற்பகலில் மக்களின் அந்த வரிசைகள் குறைந்துவிட்டன. ஆனால் தொடர்ந்து லாரிகள் மையத்திற்குள் நுழைவதைக் காண முடிந்தது” என்று அந்த நிறுவனம் தெரிவித்துள்ளது.
நேற்று புதன்கிழமை நிலவரப்படி, இந்த மொத்த விற்பனை மையத்தில் 127 தொற்று வழக்குகள் அந்த வளாகத்தில் பணிபுரிந்த மற்றும் பார்வையிட்ட மக்களிடையே கண்டறியப்பட்டன. சிங்கப்பூரின் பழம் மற்றும் காய்கறி இறக்குமதியில் 30 சதவீதம் முதல் 50 சதவீதம் இந்த மையத்தில் தான் கையாளப்படுகிறது.
சிங்கப்பூர் உணவு நிறுவனம் (SFA) கடந்த ஞாயிற்றுக்கிழமை வெளியிட்ட அறிக்கையில், பாசிர் பஞ்சாங் மொத்த விற்பனை மையத்தை தற்காலிகமாக மூடுவது சிங்கப்பூரின் பழம் மற்றும் காய்கறி விநியோகத்திற்கு “சில” இடையூறுகளை ஏற்படுத்தும், ஆனால் இது “மிகக் குறுகிய காலத்திற்கு மட்டுமே” என்று கூறியது.
கடந்த திங்களன்று இந்த மையம் மூடுவதற்கு முன்பு, பெரிய பல்பொருள் அங்காடிகள் தங்களுக்கு போதுமான பழங்கள் மற்றும் காய்கறிகள் கடையில் இருப்பதாகக் கூறியிருந்தன.