சிங்கப்பூரின் பொருளாதார வளர்ச்சிக்கும், கட்டுமானப் பணிகளுக்கும் பெரும்பங்காற்றி வரும் வெளிநாட்டு தொழிலாளர்களின் உழைப்பை அங்கீகரிக்கும் விதமாக, நேற்று (மே 18) ஒரு உணவு விநியோகத் திட்டம் நடைபெற்றது.
SG60 மற்றும் தொழிலாளர் தினக் கொண்டாட்டங்களின் ஒரு பகுதியாக, 60-க்கும் மேற்பட்ட இந்திய உணவகங்கள் ஒன்றிணைந்து தீவு முழுவதும் 60,000 உணவுப் பொட்டலங்களை வழங்கியுள்ளனர்.
இந்திய உணவகங்களின் சங்கம் (Indian Restaurants Association) இந்த முயற்சியை ஒருங்கிணைத்ததுடன், மனிதவள அமைச்சகமும் (Ministry of Manpower) இதற்கு முழு ஆதரவு அளித்தது. அமைச்சகத்தின் தகவலின்படி, வெளிநாட்டு தொழிலாளர்களுக்காக சிங்கப்பூரில் ஒரே நாளில் மேற்கொள்ளப்பட்ட மிகப்பெரிய உணவு விநியோக முயற்சி இது.
சைவம், அசைவம் மற்றும் ஓரியண்டல் உணவு வகைகள் அடங்கிய உணவுப் பொட்டலங்கள் லிட்டில் இந்தியாவில் உள்ள பிர்ச் சாலை, 28 தங்குமிடங்கள், ஐந்து பொழுதுபோக்கு மையங்கள் மற்றும் பல்வேறு வழிபாட்டுத் தலங்களில் விநியோகிக்கப்பட்டன. மில்லினியா இன்ஸ்டிடியூட் மற்றும் பியர்ஸ் செகண்டரி பள்ளிகளைச் சேர்ந்த 160-க்கும் மேற்பட்ட தன்னார்வலர்கள், அரசு அதிகாரிகள் மற்றும் சமூகப் பங்காளிகள் இந்த விநியோகப் பணியில் உதவி செய்தனர்.
பிர்ச் சாலையில் அமைக்கப்பட்டிருந்த விநியோக மையத்தில் மட்டும் சுமார் 15,000 உணவுப் பொட்டலங்கள் வழங்கப்பட்டன. இந்த இடம் ஒரு கலகலப்பான சமூக இடமாக மாற்றப்பட்டிருந்தது. அங்கு ஊடாடும் செயல்பாட்டு நிலையங்கள் (interactive activity stations) மற்றும் கலாச்சார நிகழ்ச்சிகள் ஏற்பாடு செய்யப்பட்டிருந்தன.
இந்த நிகழ்வின் சிறப்பு விருந்தினராக மனிதவள அமைச்சர் டாக்டர் தான் சீ லேங் பங்கேற்றார். அவர் இரவு 7 மணியளவில் தொழிலாளர்கள் மற்றும் தன்னார்வலர்களுடன் இணைந்து உணவு அருந்தினார். இந்த நிகழ்வில் உரையாற்றிய டாக்டர் தான், இந்த முயற்சியில் ஈடுபட்ட 60 உணவகங்களின் முயற்சிகளைப் பாராட்டினார். இந்த திட்டத்தை ஏற்பாட்டாளர்கள் பிப்ரவரி மாதத்தில் இருந்தே திட்டமிட்டு வந்துள்ளனர் என்பது குறிப்பிடத்தக்கது.
சிங்கப்பூர் பொதுப் போக்குவரத்துக் கட்டணத்தில் புதிய வசதி: அமெரிக்கன் எக்ஸ்பிரஸ்!
அமைச்சர் தான் சீ லேங் மேலும் கூறுகையில், “இன்று அதிகாலை 4 மணி முதலே, எங்களது அர்ப்பணிப்புள்ள உணவகப் பங்காளிகள் உணவு தயாரிக்கும் பணியைத் தொடங்கி, நாள் முழுவதும் எங்களது வெளிநாட்டு நண்பர்களுக்கு புதிய உணவுகளை வழங்கி வருகின்றனர். இது ஒரு பெரிய பணி. ஆனால், அவர்கள் அதை மிகுந்த அன்போடும், அர்த்தமுள்ள நோக்கத்தோடும் நிறைவேற்றியுள்ளனர்.”
“தொழிலாளர் தினம் என்பது சிங்கப்பூரில் உள்ள பல்வேறு துறைகளைச் சேர்ந்த தொழிலாளர்களின் கடின உழைப்பு, அர்ப்பணிப்பு மற்றும் விடாமுயற்சி ஆகியவற்றை போற்றும் நாளாகும். இந்த ஆண்டு நாம் SG60 கொண்டாடும் வேளையில், சிங்கப்பூரின் வெற்றி கதையில் நமது வெளிநாட்டு நண்பர்களின் தியாகங்களையும், பங்களிப்புகளையும் நினைவுகூர்வது பொருத்தமானது. நமது வீடுகளைக் கட்டுவதிலும், உள்கட்டமைப்பைப் பராமரிப்பதிலும், நமது நகரத்தை சீராக இயக்குவதிலும் அவர்களின் பங்களிப்பு விலைமதிப்பற்றது. இந்த கொண்டாட்டம் அவர்களுக்கு நாம் தெரிவிக்கும் ஒரு சிறிய நன்றி,” என்றும் அவர் குறிப்பிட்டார்.
இந்த மகத்தான உணவு விநியோக முயற்சி சிங்கப்பூரில் உள்ள பல்வேறு தரப்பினரின் ஒற்றுமையையும், வெளிநாட்டு தொழிலாளர்கள் மீதான மரியாதையையும் வெளிப்படுத்துவதாக அமைந்தது.
