நீங்கள் சிங்கப்பூரின் சாங்கி விமான நிலையம் செல்கிறீர்கள் என்றால் அது நிச்சயம் ஆடம்பரமான மற்றும் வளமான அனுபவமாக மாறப்போகிறது என்று தான் அர்த்தம். பல விருதுகளைப் பெற்ற இந்த விமான நிலையம் இப்போது மற்றொரு ஈர்ப்பையும் இணைத்துள்ளது. விமான நிலையத்திற்குள் உலகின் முதல் வெளிப்புற மூங்கில் தோட்டம் உருவாக்கபட்டுள்ளது. இந்த பசுமையான ஓய்வு இடம் சாங்கி விமான நிலையம் உள்ளேயே அமைந்துள்ளது என்பதால் பயணிகள் மற்றும் பார்வையாளர்கள் எளிதில் இதை காண முடியும்.
சுமார் 526 சதுர மீட்டருக்கும் அதிகமான பரப்பளவில் பரந்து விரிந்துள்ள மூங்கில் தோப்பு, கியோட்டோவின் (ஜப்பான்) புகழ்பெற்ற அராஷியாமா மூங்கில் காடுகளை அடிப்படையாக கொண்டு உருவாக்கப்பட்டுள்ளது. உயரமான மூங்கில் தளிர்கள் மெதுவாக அசைவது, வளைந்து செல்லும் கல் பாதைகள் மற்றும் வசதியான இருக்கைகள் இந்த இடத்தை இன்னும் சிறப்பானதாக மாற்றுகிறது.
எப்போதும் திறந்திருக்கும், எப்போதும் இலவசம்..!!
சாங்கியில் உள்ள பிற பசுமையான இடங்களான பட்டாம்பூச்சி தோட்டம் மற்றும் கற்றாழை தோட்டம் போன்றவை போக்குவரத்து பயணிகளுக்காக மட்டுமே ஒதுக்கப்பட்டுள்ளன. ஆனால் இந்த மூங்கில் தோப்பு அனைவருக்கும் 24 மணி நேரமும் திறந்திருக்கும். கூடுதலாக இதற்குள் செல்ல கட்டணம் எதுவும் இல்லை.
சிறப்பு மூங்கில் வகைகள்
இந்தத் தோப்பில் உயரமான ராட்சத மூங்கில், கருமையான தண்டுகளுடன் கூடிய கருப்பு மூங்கில், குமிழ் போன்ற முனைகளைக் கொண்ட புத்தர் மூங்கில், பாரம்பரிய கைவினை பொருட்களில் பயன்படுத்தப்படும் மடாலய மூங்கில் மற்றும் தென்கிழக்கு ஆசியாவின் புகழ்பெற்ற தங்க மூங்கில் உள்ளிட்ட அற்புதமான இனங்கள் உள்ளன.
நடந்து அல்லது மிதிவண்டியில் செல்லும்போது சாங்கி விமான நிலையம் டெர்மினல் 2லிருந்து, ஹப் மற்றும் ஸ்போக் கஃபே வழியாக 200 மீட்டர் தொலைவில் இந்த தோட்டம் உள்ளது. இந்த இடத்திற்கு செல்ல சைக்கிள்கள் வாடகைக்கும் கிடைக்கும். அதே நேரம் பொது போக்குவரத்து மூலமும் மக்கள் செல்ல வசதி ஏற்படுத்தப்பட்டுள்ளது. பேருந்து எண்கள் 24, 27, 34, 36, 53, 110 மற்றும் 858 உள்ளிட்டவற்றில் ஏறி “சாங்கி விமான நிலைய முனையம் 2 க்குப் பிறகு வரும் நிறுத்தத்தில் இறங்கி நடந்து செல்லலாம்.
