சிங்கப்பூர் பொதுப் போக்குவரத்தில் அமெரிக்கன் எக்ஸ்பிரஸ் அட்டைகள் அறிமுகம்
சிங்கப்பூர், மே 14 – சிங்கப்பூரின் பொதுப் போக்குவரத்துச் சேவைகளான பேருந்துகள் மற்றும் ரயில்களில் இனி அமெரிக்கன் எக்ஸ்பிரஸ் (American Express) அட்டைகளையும் பயன்படுத்தலாம் என்று நிலப் போக்குவரத்து ஆணையம் (Land Transport Authority – LTA) மற்றும் அமெரிக்கன் எக்ஸ்பிரஸ் நிறுவனம் கூட்டாக அறிவித்துள்ளன. இந்த புதிய வசதி நாளை மறுநாள், மே 15ஆம் தேதி முதல் நடைமுறைக்கு வருகிறது.
இதன் மூலம், பொதுப் போக்குவரத்தில் கட்டணம் செலுத்துவதற்கு ஏற்றுக்கொள்ளப்படும் வங்கிக் கடன் அட்டைகளின் பட்டியலில் அமெரிக்கன் எக்ஸ்பிரஸ் அட்டையும் இணைந்துள்ளது. இருப்பினும், பயணிகள் பயன்படுத்தும் கடன் அட்டைகள் தொடர்பில்லா (contactless) வசதி கொண்டவையாக இருப்பது அவசியம் என்று தெரிவிக்கப்பட்டுள்ளது.
இந்த புதிய வசதி குறித்து நிலப் போக்குவரத்து ஆணையம் வெளியிட்ட அறிக்கையில், பொதுமக்கள் இனிமேல் பொதுப் போக்குவரத்திற்காக தனியாக பயண அட்டையை எடுத்துச் செல்ல வேண்டியதில்லை என்றும், அல்லது அந்த அட்டையில் அவ்வப்போது பணத்தை நிரப்ப வேண்டிய சிரமம் இருக்காது என்றும் குறிப்பிடப்பட்டுள்ளது.
மேலும், ஈஸி லிங்க் (EZ-Link) அட்டைகளுக்கு வசூலிக்கப்படும் அதே கட்டணமே அமெரிக்கன் எக்ஸ்பிரஸ் அட்டை பயனர்களுக்கும் வசூலிக்கப்படும் என்றும், இதில் எந்தவிதமான கூடுதல் கட்டணமும் இல்லை என்றும் தெளிவுபடுத்தப்பட்டுள்ளது. பயணிகள் தங்கள் கடன் அட்டை அறிக்கையின் மூலமாக பயணச் செலவுகளை எளிதாகக் கண்காணிக்க முடியும்.
அதே நேரத்தில், பயணிகள் தங்கள் பயணத்தின்போது ஒரே கடன் அட்டையை மட்டுமே பயன்படுத்த வேண்டும் என்று அதிகாரிகள் அறிவுறுத்தியுள்ளனர். பேருந்தில் ஏறும்போதும், இறங்கும்போதும் வெவ்வேறு அட்டைகளைப் பயன்படுத்தினால் கூடுதல் கட்டணம் வசூலிக்கப்படும் என்றும் எச்சரிக்கை விடுக்கப்பட்டுள்ளது.
இந்த புதிய வசதி சிங்கப்பூர் பொதுப் போக்குவரத்தை மேலும் எளிதாகவும், வசதியாகவும் மாற்றும் என்று எதிர்பார்க்கப்படுகிறது.
