சென்னை: ஐக்கிய அரபு அமீரகத்தின் ஷார்ஜா நகரில் பல்வேறு தொழில்நுட்பப் பணிகளுக்குத் தமிழக இளைஞர்களை வேலைக்கு அமர்த்த தமிழ்நாடு அரசின் அயல்நாட்டு வேலைவாய்ப்பு நிறுவனம் (OMCL) தீவிரமாக களமிறங்கியுள்ளது. ஸ்டீல் ஸ்ட்ரக்சுரல் ஃபேப்ரிகேட்டர், சிஎன்சி லேசர் கட்டிங் மெஷின் புரோகிராமர் மற்றும் ஆபரேட்டர், போர்க் லிப்ட் மற்றும் ஜேவிசி ஆபரேட்டர், பிரெஸ் டால் மற்றும் ஷீட் மெட்டல் டை மேக்கர், மார்க்கெட்டிங் இன்ஜினீயர், புரொடக்சன் இன்ஜினீயர், ஏசி டெக்னீசியன் போன்ற பல்வேறு பதவிகளுக்குத் தகுதியான நபர்களைத் தேர்ந்தெடுக்கும் பணியில் OMCL ஈடுபட்டுள்ளது.
தொழிலாளர் நலன் மற்றும் திறன் மேம்பாட்டுத் துறையின் கீழ் இயங்கும் OMCL, வெளிநாடுகளில் நம்பகமான வேலைவாய்ப்புகளைத் தமிழக இளைஞர்களுக்குப் பெற்றுத் தருவதில் முக்கியப் பங்காற்றி வருகிறது. போலி முகவர்களை நம்பி ஏமாறாமல் இளைஞர்கள் பயனடைய வேண்டும் என்ற உயரிய நோக்கத்துடன் இந்த நிறுவனம் செயல்பட்டு வருகிறது. இதன் மூலம் ஆண்டுதோறும் ஆயிரக்கணக்கான தமிழர்கள் வெளிநாடுகளில் நல்ல ஊதியத்துடன் பணிபுரிந்து வருகின்றனர்.
ஷார்ஜாவில் தற்போது காலியாக உள்ள மேற்கண்ட பணிகளுக்கு விண்ணப்பிக்க ஆர்வமுள்ள இளைஞர்கள் உடனடியாகத் தங்களது விண்ணப்பங்களை அனுப்பலாம் என்று OMCL நிர்வாக இயக்குனர் தெரிவித்துள்ளார். இந்த வேலைகளுக்கு விண்ணப்பிப்பவர்களுக்கு உணவு மற்றும் தங்குமிடம் இலவசமாக வழங்கப்படும் என்பது குறிப்பிடத்தக்கது.
என்னென்ன தகுதிகள் தேவை?
ஒவ்வொரு பணிக்கும் தனித்தனியான கல்வித் தகுதிகள் நிர்ணயிக்கப்பட்டுள்ளன. பொதுவாக, ஐடிஐ தேர்ச்சி அல்லது பாலிடெக்னிக் டிஎம்இ முடித்திருக்க வேண்டும். மேலும், விண்ணப்பிக்கும் பணியில் குறைந்தபட்சம் 6 ஆண்டு கால பணி அனுபவம் கட்டாயம் இருக்க வேண்டும். விண்ணப்பதாரர்களின் வயது 28 முதல் 40 வயதுக்குள் இருக்க வேண்டும்.
விண்ணப்பிப்பது எப்படி?
தகுதியுள்ள ஆண்கள் தங்களது சுயவிவரக் குறிப்பு (Resume), கல்விச் சான்றிதழ்கள், பணி அனுபவச் சான்றிதழ்கள் மற்றும் பாஸ்போர்ட் நகல் ஆகியவற்றை ovemclnm@gmail.com என்ற மின்னஞ்சல் முகவரிக்கு வரும் ஏப்ரல் 25-ம் தேதிக்குள் அனுப்பி வைக்க வேண்டும்.
நேர்காணல் எப்போது? எங்கு?
இந்த வேலைவாய்ப்புகளுக்கான நேர்காணல் மே மாதம் 3 மற்றும் 4 ஆகிய தேதிகளில் காலை 9 மணி முதல் சென்னையில் நடைபெறும். சென்னை கிண்டியில் உள்ள (பேருந்து நிலையம் அருகில்) ஒருங்கிணைந்த மாவட்ட வேலைவாய்ப்பு அலுவலக வளாகத்தில் அமைந்துள்ள அயல்நாட்டு வேலை வாய்ப்பு நிறுவனத்தில் நேரில் அனைத்து அசல் சான்றிதழ்களுடன் கலந்து கொள்ள வேண்டும்.
மேலும் விவரங்களுக்கு www.omcmanpower.tn.gov.in என்ற இணையதளத்தைப் பார்வையிடலாம் அல்லது 95662-9685 என்ற தொலைபேசி எண்ணில் தொடர்பு கொண்டு தகவல்களைப் பெறலாம் என்று OMCL நிர்வாக இயக்குனர் வெளியிட்டுள்ள அறிக்கையில் தெரிவிக்கப்பட்டுள்ளது.
ஆகவே, ஐக்கிய அரபு அமீரகத்தில் நல்ல ஊதியத்துடன் பணியாற்ற விரும்பும் தமிழக இளைஞர்கள் இந்த வாய்ப்பினை தவறாமல் பயன்படுத்திக் கொள்ளுமாறு OMCL அறிவுறுத்தியுள்ளது.
