சிங்கப்பூரின் கட்டுமானத் துறையில் தனது முழு ஈடுபாடு மற்றும் தலைமைப் பண்புகளால் பல வெளிநாட்டுத் தொழிலாளர்களுக்கு ஒரு முன்மாதிரியாகத் திகழ்கிறார் தமிழகத்தைச் சேர்ந்த 26 வயதான கட்டுமானத் தொழிலாளி சுப்ரமணியன் வீரமணி. பணியிடப் பாதுகாப்பிற்கான அவரது அயராத அர்ப்பணிப்பைப் பாராட்டி, அவருக்கு “சிறந்த ஊழியர்” விருது வழங்கப்பட்டது.
பணியிடத்தில் ஒரு சிறந்த தலைவர்:
கடந்த மூன்று ஆண்டுகளாக சிங்கப்பூர் கட்டுமானத் துறையில் பணியாற்றி வரும் சுப்ரமணியன், சக ஊழியர்களுக்கு ஒரு சிறந்த தலைவராகச் செயல்படுகிறார். ஊழியர்களின் கருத்துக்களைத் தொடர்ந்து சேகரித்து, அவற்றை நிர்வாகத்திடம் கொண்டு சென்று உரிய நடவடிக்கை எடுக்க உதவியுள்ளார். மேலும், நிறுவனத்தின் புதிய விதிகள் அல்லது கொள்கை மாற்றங்கள் குறித்த தகவல்களைத் தவறாமல் ஊழியர்களுக்குத் தெரிவித்து, அனைவரும் விழிப்புடனும் விதிமுறைகளுக்கு உட்பட்டும் இருப்பதை உறுதி செய்கிறார்.
பாதுகாப்பிற்கு முக்கியத்துவம்:
கட்டுமான வேலைகளில் பாதுகாப்பு மிக மிக அவசியம். இதை உணர்ந்து, சுப்ரமணியன் புதிய ஊழியர்களுக்குப் பாதுகாப்பு அம்சங்களைச் சரியாக எப்படிப் பயன்படுத்த வேண்டும் என்று வழிகாட்டுகிறார். சரியான தனிப்பட்ட பாதுகாப்பு உபகரணங்களை அணிந்து, சக ஊழியர்களும் அதைப் பின்பற்றுவதை உறுதிசெய்து, ஒரு நேர்மறையான முன்மாதிரியாகத் திகழ்கிறார். இவரது இந்தச் செயல்கள் பணியிடத்தில் ஒரு வலுவான பாதுகாப்பு கலாச்சாரத்தை வளர்க்க உதவுகிறது.
12 வெளிநாட்டு ஊழியர்களுக்கு விருது:
கடந்த ஜூன் 8, 2025 அன்று, புலம்பெயர்ந்த தொழிலாளர் மையம் (MWC) நடத்திய “சிறந்த ஊழியர்” விருதுகள் விழாவில், சுப்ரமணியன் வீரமணி உட்பட மொத்தம் 12 கட்டுமானத் தொழிலாளர்கள் கௌரவிக்கப்பட்டனர். இந்த விருதுகள், தொழிலாளர்களின் சிறப்பான நடத்தை மற்றும் அவர்கள் பணிபுரியும் இடத்திற்கும், சமூகத்திற்கும் ஆற்றிய மிக முக்கியமான பங்களிப்பைப் பாராட்டுவதற்காக வழங்கப்படுகின்றன.
சுப்ரமணியன் வீரமணி கூறியது:
“இந்த விருதைப் பெற்றது எனக்குப் பெருமையையும், கௌரவத்தையும் தருகிறது. இது எனது கடின உழைப்பிற்கு கிடைத்த மிகப்பெரிய அங்கீகாரம்” என்று சுப்ரமணியன் கூறினார். மேலும், நான் வேலை செய்யும் ஸ்ட்ரெய்ட்ஸ் கன்ஸ்ட்ரக்ஷன் நிறுவனம், எனது சக ஊழியர்கள், மேலாளர்கள், மற்றும் மேற்பார்வையாளர்கள் என அனைவருக்கும் நான் நன்றி சொல்லக் கடமைப்பட்டுள்ளேன்” என்றும் அவர் தெரிவித்தார்.
சிங்கப்பூரில் கிடைத்த அனுபவம்:
சுப்ரமணியன் மேலும் பேசுகையில், “சிங்கப்பூரில் வேலை செய்வது எனக்கு மிகவும் பிடித்திருக்கிறது. என் சக ஊழியர்கள் இந்தியா, சீனா, தாய்லாந்து போன்ற பல நாடுகளிலிருந்து வந்தவர்கள் என்றாலும், நாங்கள் ஒரு குடும்பத்தைப் போல ஒன்றாக இணைந்து வேலை செய்து, ஒருவருக்கொருவர் ஆதரவாக இருக்கிறோம். சிங்கப்பூரில் பணிபுரிந்ததால், நான் பல புதிய திறன்களையும், பல்வேறு கலாச்சாரங்களையும் கற்றுக்கொண்டேன்” என்றும் மகிழ்ச்சியுடன் தெரிவித்தார்.
விருது விழா: ஒரு கொண்டாட்டம்
இந்த விருது விழா, MWC-யின் வருடாந்திர மே தின புலம்பெயர் தொழிலாளர் கொண்டாட்டங்களின் முக்கிய நிகழ்வாக, சூன் லீயில் உள்ள MWC ரிக்ரியேஷன் கிளப்பில் நடைபெற்றது. “ஒன்றாக உருவாக்குவோம், ஒன்றாக கொண்டாடுவோம்” என்ற தீமுடன், சிங்கப்பூரின் 60-வது ஆண்டு விழாவை முன்னிட்டு, புலம்பெயர் தொழிலாளர்களின் பங்களிப்பைப் பாராட்டும் வகையில் இந்நிகழ்ச்சி நடைபெற்றது.
விருது பெற்ற மற்றவர்களும்:
இந்த விழாவில், சுப்ரமணியன் வீரமணியைத் தவிர, மேலும் சிலரும் விருது பெற்றனர்.
வங்கதேசத்தைச் சேர்ந்த ராணா ஜுவல் அஹமத் (38 வயது): இவர் எட்டு கிரேன்களை நிர்வகிக்கும் தலைமைப் பண்பு மற்றும் பாதுகாப்பு விழிப்புணர்வுக்காக இந்த விருதைப் பெற்றார்.
தாய்லாந்தைச் சேர்ந்த கம்ஸ்ரி வீரயுத்: இவர் தனது நேர்மறையான அணுகுமுறை மற்றும் இலக்குகளை அடைவதில் உள்ள ஆர்வத்திற்காக கௌரவிக்கப்பட்டார்.
இவர்கள் அனைவரும் Built Environment and Urban Trades Employees’ Union (BATU) மற்றும் பிற சமூக அமைப்புகளால் பரிந்துரைக்கப்பட்டு விருது பெற்றவர்கள் ஆவர்.
சிங்கப்பூரில் வெளிநாட்டு ஊழியர்களுக்கு மாபெரும் கொண்டாட்டம் களைகட்டுகிறத! MWC ஏற்பாடு
இந்த ஆண்டு நடைபெற்ற SG60 மே தினக் கொண்டாட்டம், “ஒன்றாகக் கட்டியெழுப்புவோம், ஒன்றாகக் கொண்டாடுவோம்” என்ற கருப்பொருளுடன் நடைபெற்றது. சிங்கப்பூரின் வளர்ச்சிக்கு புலம்பெயர்ந்த தொழிலாளர்கள் ஆற்றிய பங்களிப்புகளையும், தொழிலாளர்களுக்கும் முதலாளிகளுக்கும் இடையிலான வலுவான உறவுகளையும் இந்தக் கொண்டாட்டம் எடுத்துரைத்தது.
MWC நிர்வாக இயக்குநர் திரு. லிம் பேசுகையில், “மே தினத்தைக் கொண்டாடும் இந்த நேரத்தில், சிங்கப்பூரின் 60வது பிறந்தநாளை நினைவு கூறும் போதும், சிங்கப்பூரின் வளர்ச்சிக்கு புலம்பெயர்ந்த தொழிலாளர்களின் பங்களிப்புகளை நாம் மறக்கக் கூடாது. கடந்த காலத்தில் மட்டுமல்ல, அடுத்த 60 ஆண்டுகால நமது முன்னேற்றத்திற்கும் அவர்களின் பங்களிப்புகள் மிக முக்கியம். இன்றைய கொண்டாட்டம் அவர்களின் பணியைக் கௌரவிப்பதற்காகவே.
