2025-ஆம் ஆண்டின் முதல் மூன்று மாதங்களில் (Q1), சிங்கப்பூரில் வேலைச் சந்தை கொஞ்சம் மந்தமாக இருக்கிறது.
உலக அளவில் பொருளாதாரப் பிரச்சனைகள் மற்றும் நாடுகளுக்கு இடையேயான வர்த்தகச் சண்டைகள் காரணமாக, வேலை இல்லாதவர்களின் எண்ணிக்கை சற்று கூடியுள்ளது.
அதே நேரத்தில், புதிதாக உருவாக்கப்படும் வேலைகளின் எண்ணிக்கையும் குறைந்துவிட்டது.
2025-ஆம் ஆண்டின் முதல் 3 மாதங்களில் (Q1), சிங்கப்பூரில் வேலையில்லாதவர்களின் எண்ணிக்கை சற்று உயர்ந்துள்ளது.
- மொத்தமாகப் பார்த்தால், வேலை இல்லாதவர்களின் விகிதம் 1.9%-இல் இருந்து 2.0% ஆக உயர்ந்துள்ளது.
- சிங்கப்பூரில் நிரந்தரமாக வசிப்பவர்களின் (Residents) விகிதம் 2.8%-இல் இருந்து 2.9% ஆக உயர்ந்துள்ளது.
- சிங்கப்பூர் குடிமக்களின் (Citizens) விகிதம் 2.9%-இல் இருந்து 3.1% ஆக உயர்ந்துள்ளது.
MOM என்ன சொல்கிறது?
மனிதவள அமைச்சகம் (MOM) என்ன சொல்கிறது என்றால், இந்த உயர்வு இருந்தாலும், இது ஒன்றும் பொருளாதார மந்தநிலை (Recession) காலங்களில் இருக்கும் அளவுக்கு அதிகமில்லை. இது சாதாரண நாட்களில் இருக்கும் அளவுக்குத்தான் இருக்கிறது.
ஏன் இந்த உயர்வு?
உலகப் பொருளாதாரம் இப்போது உறுதியாக இல்லாததே இந்த உயர்வுக்கு முக்கியக் காரணம். குறிப்பாக, அமெரிக்க ஜனாதிபதி டொனால்ட் ட்ரம்ப் விதித்த வர்த்தக வரிகள் (Tariffs), உலகம் முழுவதும் நடக்கும் வியாபாரத்தைப் பாதித்துள்ளன. அதனால், வியாபாரத்தை அதிகம் நம்பியிருக்கும் சிங்கப்பூர் போன்ற நாடுகளுக்குச் சிரமம் கூடியுள்ளது.
வேலைவாய்ப்பு வளர்ச்சி குறைந்துள்ளது
2025-ஆம் ஆண்டின் முதல் மூன்று மாதங்களில் (Q1) புதிய வேலைவாய்ப்புகள் உருவாவது குறைந்துள்ளது.
- இந்த மூன்று மாதங்களில் மொத்தம் 2,300 புதிய வேலைகள்தான் உருவாகியுள்ளன.
- இது கடந்த ஆண்டின் கடைசி மூன்று மாதங்களில் உருவான 7,700 புதிய வேலைகளை விடவும், 2024-ஆம் ஆண்டின் முதல் மூன்று மாதங்களில் உருவான 3,200 புதிய வேலைகளை விடவும் மிகவும் குறைவு.
வேலைவாய்ப்பு எந்தத் துறைகளில் குறைந்தது?
குறிப்பாக, வெளிநாடுகளுடன் அதிகம் தொடர்புள்ள சில துறைகளில் வேலைவாய்ப்பு குறைந்துள்ளது. அதாவது, Professional Services, Manufacturing மற்றும் Information and Communications போன்ற துறைகளில் சிங்கப்பூரர்கள் மற்றும் நிரந்தர குடியிருப்பாளர்களுக்கு வேலை கிடைப்பது குறைந்துள்ளது.
வேலைவாய்ப்பு எந்தத் துறைகளில் கூடியது?
நல்ல செய்தி என்னவென்றால், சில துறைகளில் வேலைவாய்ப்பு தொடர்ந்து அதிகரித்துள்ளது.
- Health and Social Services (சுகாதாரம் மற்றும் சமூக சேவை)
- Financial Services (நிதிச் சேவை)
இந்தத் துறைகளில் சிங்கப்பூரர்கள் மற்றும் நிரந்தர குடியிருப்பாளர்களுக்கு அதிக வேலைகள் கிடைத்துள்ளன.
அதேபோல், வெளிநாட்டு ஊழியர்களுக்கான (Non-Residents) வேலைகள், Administrative and Support Services மற்றும் Community, Social, and Personal Services போன்ற துறைகளில் அதிகரித்துள்ளன.
வேலை நீக்கங்கள் (ஆட்குறைப்பு) குறைந்துள்ளன
2025-ஆம் ஆண்டின் முதல் 3 மாதங்களில், சிங்கப்பூரில் வேலையை விட்டு நீக்கப்பட்டவர்களின் (பணிநீக்கம் செய்யப்பட்டவர்களின்) எண்ணிக்கை குறைந்துள்ளது.
- இந்த மூன்று மாதங்களில் மொத்தம் 3,300 பேர் வேலை இழந்தனர்.
- இது அதற்கு முந்தைய மூன்று மாதங்களில் 3,680 பேர் வேலை இழந்ததை விடக் குறைவு.
ஒவ்வொரு 1,000 ஊழியர்களுக்கும், முன்பு 1.5 பேர் வேலை இழந்த நிலையில், இப்போது 1.3 பேர் மட்டுமே வேலை இழந்தனர்.
இதற்கான முக்கிய காரணம் என்ன?
நிறுவனங்கள் தங்களை மாற்றி அமைத்துக்கொண்டதாலும், புதுப்பித்ததாலும்தான் இந்த ஆட்குறைப்பு நடந்துள்ளது. அதாவது, நிறுவனங்கள் தங்களின் செயல்பாட்டை மேம்படுத்தும் முயற்சியில் ஊழியர்களைக் குறைத்துள்ளன.
பொருளாதாரத்தில் ஏற்பட்ட பெரிய வீழ்ச்சி காரணமாக இந்த ஆட்குறைப்பு செய்யவில்லை என்பது ஒரு நல்ல செய்தி.
அரசாங்கத்தின் ஆதரவுத் திட்டங்கள்
சிங்கப்பூர் அரசாங்கம், இப்போது நிலவும் வேலைச் சந்தை சவால்களைச் சமாளிக்கப் பல உதவிகளைச் செய்து வருகிறது.
- SkillsFuture Jobseeker Support திட்டம்: இந்தத் திட்டம் வேலையை இழந்தவர்களுக்கு ஒரு தற்காலிக நிதி உதவி வழங்குகிறது. இதன் மூலம் 6 மாதங்களுக்கு S$6,000 வரை நிதி உதவி கிடைக்கும். இந்த உதவி 2024 ஏப்ரல் 1-க்கு பிறகு வேலையை இழந்தவர்களுக்கு ஒருமுறை கிடைக்கும், மேலும் இது வேலை தேடுவதற்கும், புதிய பயிற்சிகளை எடுப்பதற்கும் உதவும்.
- CareersFinder: MyCareersFuture என்ற இணையதளத்தில் உள்ள இந்த அம்சம், வேலை தேடுபவர்களுக்கு எந்தத் துறையில் பயிற்சி பெறலாம், எந்த வேலைக்கு விண்ணப்பிக்கலாம் என்று வழிகாட்டும்.
- பணிக்குழு: உலகம் முழுவதும் நடக்கும் வர்த்தகப் பிரச்சனைகளின் தாக்கத்தைக் குறைக்க, நிறுவனங்களுக்கும், ஊழியர்களுக்கும் உதவ அரசாங்கம் ஒரு சிறப்புக் குழுவை அமைத்துள்ளது.
சிங்கப்பூரில் வேலைவாய்ப்பு: யார், எந்தத் துறையில் வேலை பெறுகிறார்கள்?
சிங்கப்பூரில் திறமையான வேலைகளில் (PMET – Professionals, Managers, Executives, and Technicians) குடியிருப்பாளர்களுக்கான (Residents) வேலை வாய்ப்புகள் நன்றாக வளர்ந்துள்ளன.
அதிக திறன் தேவைப்படும் துறைகளில் வேலை அதிகம்:
2024-ஆம் ஆண்டில், சிங்கப்பூர் குடிமக்களும் நிரந்தரக் குடியிருப்பாளர்களும் அதிகமாகப் பணியில் சேர்ந்த துறைகள்:
- நிதி மற்றும் காப்பீடு: 5,300 பேர்
- சுகாதாரம் மற்றும் சமூக சேவை: 5,200 பேர்
- தொழில்முறை சேவைகள்: 5,000 பேர்
- தகவல் மற்றும் தொலைத்தொடர்பு: 4,200 பேர்
குறைந்த திறன் தேவைப்படும் துறைகளில் வேலை குறைவு:
- உணவு மற்றும் பானங்கள்: 2,100 வேலைகள் குறைந்துள்ளன.
- நிர்வாக சேவைகள்: 700 வேலைகள் குறைந்துள்ளன.
வெளிநாட்டு ஊழியர்களின் எண்ணிக்கை குறைந்தது:
2024-ல் சிங்கப்பூருக்கு வேலைக்கு வந்த வெளிநாட்டு ஊழியர்களின் எண்ணிக்கை (Non-Residents) கணிசமாகக் குறைந்துள்ளது.
- 2023-இல் 83,500 வெளிநாட்டு ஊழியர்கள் வேலைக்கு வந்த நிலையில்,
- 2024-இல் 35,700 பேர் மட்டுமே வந்துள்ளனர்.
இதில் பெரும்பாலோனோர் Work Permit வைத்திருப்பவர்கள் ஆவர்.
EP மற்றும் S பாஸ் நிலை:
Employment Pass மற்றும் S Pass வைத்திருப்பவர்களின் எண்ணிக்கை பெரிய அளவில் மாறவில்லை. COMPASS போன்ற புதிய விதிகளாலும், அதிக சம்பளம் கொடுக்க வேண்டும் என்ற நிபந்தனைகளாலும் இந்த பாஸ்களின் எண்ணிக்கை கட்டுப்படுத்தப்பட்டுள்ளது.
