சிங்கப்பூர்: இந்த ஆண்டின் இரண்டாவது மற்றும் இறுதி குறுநிலவு (Micromoon) நிகழ்வு எதிர்வரும் செவ்வாய்க்கிழமை, மே 13 ஆம் தேதி இரவு வானில் தோன்றவுள்ளது. வானிலை சாதகமாக இருக்கும் பட்சத்தில், இந்த அரிய வானியல் காட்சியை சிங்கப்பூரின் பல்வேறு பகுதிகளில் இருந்தும் கண்டு ரசிக்கலாம் என்று தெரிவிக்கப்பட்டுள்ளது.
வானியல் தகவல்களை வழங்கும் ‘டைம்அண்ட்டேட்.காம்’ (timeanddate.com) இணையதளத்தின் தகவலின்படி, செவ்வாய்க்கிழமை இரவு 7.34 மணிக்கு முழுநிலவு உதயமாகும். இந்த குறுநிலவை பின்னிரவு 12.56 மணியளவில் மிகத் தெளிவாகக் காண முடியும் என்று அந்த இணையதளம் குறிப்பிட்டுள்ளது.
குறுநிலவு என்றால் என்ன?
நிலா பூமியை நீள்வட்டப் பாதையில் சுற்றி வருகிறது என்பது அனைவரும் அறிந்ததே. இந்த நீள்வட்டப் பாதையில் நிலா பூமியிலிருந்து மிகத் தொலைவில் இருக்கும்போது பௌர்ணமி (முழுநிலவு) தோன்றினால், அது வழக்கமான பௌர்ணமி நிலவை விட அளவில் சிறியதாகக் காட்சி அளிக்கும். இந்த நிகழ்வுதான் குறுநிலவு என்று அழைக்கப்படுகிறது.
இதற்கு நேர்மாறாக, நிலா தனது சுற்றுப்பாதையில் பூமிக்கு மிக அருகில் இருக்கும்போது பௌர்ணமி தோன்றினால், அது அளவில் வழக்கத்தை விட மிகப் பெரியதாகத் தெரியும். இந்த நிகழ்வு பெருநிலவு (Supermoon) என்று குறிப்பிடப்படுகிறது.
குறுநிலவு vs பெருநிலவு:
‘timeanddate.com’ வெளியிட்டுள்ள தகவலின்படி, ஒரு குறுநிலவானது ஒரு பெருநிலவை விட தோராயமாக 12.5 விழுக்காடு முதல் 14.1 விழுக்காடு வரை சிறியதாகத் தோன்றும். மேலும், ஒரு வழக்கமான முழுநிலவை ஒப்பிடும்போது, குறுநிலவானது சுமார் 5.9 விழுக்காடு முதல் 6.9 விழுக்காடு வரை சிறியதாக இருக்கும். இந்த சிறிய அளவு மாற்றத்தை கூர்ந்து கவனித்தால் மட்டுமே உணர முடியும்.
மே மாத முழுநிலவு – ‘Flower Moon’:
ஆங்கில நாட்காட்டியின்படி, மே மாதத்தில் தோன்றும் முழுநிலவு ‘ஃப்ளவர் மூன்’ (Flower Moon) என்று அழைக்கப்படுகிறது. வட அமெரிக்காவில் இந்த காலகட்டத்தில் பூக்கள் பூக்கத் தொடங்குவதால், இந்த நிலவுக்கு இப்பெயர் சூட்டப்பட்டுள்ளது என்பது குறிப்பிடத்தக்கது.
Sengkang-Punggol ரயில் நிலையத்தில் புதிய ரயில்கள் குறித்து முக்கிய தகவல் வெளியீடு !
சிங்கப்பூரில் எங்கு காணலாம்?
எதிர்வரும் செவ்வாய்க்கிழமை தோன்றும் இந்த அரிய குறுநிலவு நிகழ்வை சிங்கப்பூரின் அனைத்துப் பகுதிகளில் இருந்தும் காண முடியும். எனினும், மரினா அணைக்கட்டு (Marina Barrage), கிழக்கு கடற்கரை பூங்கா (East Coast Park) போன்ற திறந்தவெளிப் பகுதிகள் குறைவான ஒளி மாசுபாட்டைக் கொண்டிருப்பதால், இங்கிருந்து பார்த்தால் குறுநிலவின் அழகை முழுமையாக ரசிக்க முடியும்.
வானியல் ஆர்வலர்கள் மற்றும் பொதுமக்கள் இந்த அரிய வானியல் நிகழ்வை காணத் தவறாதீர்கள். செவ்வாய்க்கிழமை இரவு வானிலை எப்படி இருக்கும் என்பதை பொறுத்திருந்து பார்ப்போம்!
சிங்கப்பூர் வானில் தோன்றும் “Blue Moon” – நம்மால் பார்க்கமுடியுமா? எப்போது பார்க்கலாம்? முழு விவரம்
